5 Nëntori - Dita Ndërkombëtare kundër Dhunës dhe Bullizmit në Shkollë, përfshirë Cyberbullying Në shenjë të kësaj dite, në shkollën tonë u zhvilluan aktivitete edukative dhe ndërgjegjësuese me nxënësit e klasave I-V, në bashkëpunim të ngushtë ndërmjet psikologes së shkollës dhe mësimdhënëseve. Përmes lojërave interaktive, aktiviteteve simbolike dhe lojës me role, nxënësit reflektuan mbi rëndësinë e empatisë, respektit, pranimit të dallimeve dhe mbështetjes ndaj njëri-tjetrit, duke mësuar të dallojnë shakanë nga bullizmi dhe të reagojnë me përgjegjësi ndaj tij. Besojmë se një shkollë e sigurt dhe miqësore ndërtohet çdo ditë, përmes kujdesit, mirëkuptimit dhe bashkëpunimit të të gjithë komunitetit shkollor.

STEAM – Programojmë të ardhmen Dita e tretë e Javës së Projekteve – Nga kureshtja te krijimi! Sot, në fokus janë nxënësit e klasave VI–IX, të cilët përmes hulumtimit, bashkëpunimit dhe krijimtarisë po u japin formë ideve të tyre. Duke ndërthurur njohuritë nga lëndë të ndryshme, nxënësit hulumtojnë, shkëmbejnë mendime, provojnë zgjidhje dhe përgatisin prezantimet e tyre. Në çdo hap, mësojnë të ndajnë përgjegjësitë, të argumentojnë idetë dhe të ndërtojnë së bashku një rezultat të përbashkët. Një moment i veçantë në kuadër të këtyre projekteve ishte vizita e OJQ-së “Dëgjo zërin tim”, së bashku me përfaqësues nga KFOR-i zviceran, në projektin “Ngjyra pa kufij”. Një takim që solli në vëmendje rëndësinë e përfshirjes, mirëkuptimit dhe bashkëpunimit. Po ndajmë me ju disa momente nga ky rrugëtim, sepse në M3 çdo ide merr vlerë përmes punës dhe çdo përvojë sjell një mësim të ri!

STEAM – Programojmë të ardhmen Dita e dytë e Javës së Projekteve – Të vegjlit me ide të mëdha! Sot, në fokusin tonë ishin nxënësit e klasave I–V, të cilët na dëshmuan se për ide të mëdha nuk duhet domosdoshmërisht të jesh i madh! Me lapsa në duar, ide në mendje dhe plot pyetje për mësimdhënësit, nxënësit vazhduan punën në projektet e tyre. Diku punohej në grupe, diku diskutoheshin zgjidhjet, e diku një ide e re ndryshonte gjithë planin! Por dita nuk ishte vetëm punë! Mes aktiviteteve, lojërave, të qeshurave dhe momenteve argëtuese, nxënësit treguan se të mësuarit mund të jetë po aq interesant sa edhe loja. Një nga momentet e veçanta të ditës ishte edhe vizita në Bibliotekën Kombëtare të Kosovës, në kuadër të projektit “Lexojmë dhe ndajmë aventura”, ku nxënësit e klasave IV dhe V patën mundësinë ta përjetojnë botën e librave edhe jashtë mureve të shkollës. Sot po ndajmë me ju disa nga momentet e këtij rrugëtimi, ku puna, loja, miqësia dhe përvojat e reja ndërthuren natyrshëm, ndërsa nxënësit janë protagonistët e çdo aktiviteti. Pak punë, pak lojë, shumë ide dhe plot buzëqeshje – kështu duket një ditë projektesh me klasat I–V në M3.